सिन्धुलीमाढी, २० पुस । सिन्धुली कारागारमा बुधबार राति कैदीबन्दीबीच झडपमा कैदी निरज देवकोटाको मृत्युको विषयलाई लिएर आज पनि सिन्धुलीमाढी तनावग्रस्त रहेको छ ।

नेपाली काँग्रेस सिन्धुली र मृतकका आफन्तहरुले बजार तथा यातायातका साधन बन्द गरी बजार क्षेत्रका केही स्थानमा टायर बालेर बजार क्षेत्रका विभिन्न स्थानमा नाराजुलुस गरिरहेका छन् ।

बिहान ८ बजेदेखि प्रशासनले लगाएकोे कफ्र्यु आदेशसमेत अहिले ३ बजेसम्मका लागि स्थगित गरिएको जानकारी दिँदै प्रमुख जिल्ला अधिकारी केशवराज आचार्यले भन्नुभयो, ‘‘हिंसा भड्किने अवस्था आएमा पुनः कफ्र्यु आदेश जारी गर्ने अवस्थामा छौँ । तर स्थिति सामान्य रहेमा कफ्र्यु आदेश जारी गर्ने अवस्थामा छैनौँ ।’’

पीडित पक्षले न्यायिक छानबिन आयोग गठन, दोषीलाई कारबाही, मृतकलाई सहिद घोषणा गरिनुपर्ने र पीडितलाई उचित क्षतिपूर्तिको माग गर्दै नाराबाजी गरिरहेका छन् भने हालसम्म मृतक देवकोटाका आफन्तहरुले शव बुझेका छैनन् ।

परिवारजनलाई थाहा नै नदिई काठमाडौँ पठाएकाले प्रशासनले नै देवकोटाको शव सिन्धुली ल्याउनुपर्ने माग रहेकोसमेत मृतकका आफन्त केदारप्रसाद अधिकारीले जानकारी दिनुभयो ।

त्यसैगरी, बुधबार राति सिन्धुली कारागारमा देवकोटामाथि कुटपिटमा संलग्न भएको आरोपमा ११ जनालाई छानबिनका लागि हिरासतमा लिइएको जानकारी प्रजिअ दिनुभयो । रासस

हाम्रो फेसबुक पेज लाइक गर्नुहोस

Tags:  News